رومانســـية مـفـقـودة بينـي وبينـك
المفروض لما أشوفك أخبي وأكتب جوه مني كلامك من غير ما أقوله .. والمفروض برضه
لما أشوفك أغني غنوتي إللي كتبتها عشانك بس أغنيها لنفسي .. والمفروض إني لما
أشوفك أخاف أسلم عليك أحسن يبان من حبي من رعشة إيديا في إيديك .. والمفروض
لما أشوفك عيني ماتجيش في عينك من ضعفها .. المفروض إيه كمان لما أشوفك ؟؟!
والحلم يكون إزاى لو يوم من غيرك .. ويكون إزاى لو مش ليك وعشانك .. ولو وردتي
ماقالتش .. مين إللي هيقول ..
كان مفروض تلمس فيا المعاني .. وتحس سكوت حلمي قدامك وجنون فكرتي بجد لما
بقولك - وبكل جد - ماتسيبك من كل شئ في إيدك وتيجي نجري .. ونأخذ النسيم
بالأحضان .. وتبص لفوق .. فوق قوي .. أبعد شوية .. يمكن نلاقي النجمة إللي فوق
مكتوب عليها إسمي وإسمك .. يمكن تبص في كفك تلاقي صورتي بتبتسملك .. هو إحنا
ليه متقيدين من غير قيود ؟؟!
آه .. أنا كل يوم حلمي يتمرد شوية ويتمنى غير حلمي حلم جديد ومش بعيد يحاول
يشيلك من كيان حلمي .. ودايما بيكون خسران .. ومش بعيد أحاول أكتب مليون قصيدة
هجاء في حبك .. وفي ملامحك إللي دايب فيها إللي يمكن أكتب فيها أسوأ وصف وأرسم لها
أسوأ لوحة .. ومش بعيد أكتب فيك أسوأ ما كتبت في حياتي .. لكني الأكيد في النهاية -
دايما - بكسر القلم وأقطع الورق وأقطف وردة وأعطيهالك
رومانســـية مـفـقـودة بينـي وبينـك
النمط الخطي
